本文重點
邊個敢話「入樽王」雪到硬晒？紐約人後衞尼特羅賓遜早前得罪教練被放入雪櫃，但估唔到一「放監」即刻有料到，尋日首度復出個人轟入41分，一人之力協助紐約人加時後以112:108作客擊敗鷹隊，聽日紐約人主場遇上溜馬，睇怕都要睇「入樽王」表演嘞！（有線體育台62及165台周一早上7時直播）
尼特羅賓遜早前因為同教練迪安東尼鬧交，自上年十二月一日開始就冇再為紐約人上陣，羅賓遜更一度透過經理人表示想轉會，結果被聯盟重罰2萬5千美元。
一己之力搞掂鷹隊
不過尋日作客鷹隊，羅賓遜突然獲得解凍，呢位「入樽王」明顯餓波，喺最後時刻更主宰球隊進攻命脈，包辦紐約人最後21分中嘅19分，當中有11分就喺加時取得，幾乎以一人之力協助紐約人贏波。
已在NBA征戰五年嘅尼特羅賓遜賽後表示，尋日出返場覺得自己好似新人一樣，並表示感謝隊友支持，希望可以繼續留喺紐約人。球隊有番呢位射手，進攻能力一定大幅上升，聽日主場對住已經8連敗嘅溜馬，相信紐約人可輕鬆再下一城。