02/01/2010

播放本新聞相關短片

2010來了!一個字:潮

○九年無疑令香港體育迷難以忘懷,C朗驚天轉會、港球迷坐爆大球場、東亞運等等大事都夠晒刻骨銘心。不過各位「巴打」,以上嘅嘢都已經Out到核爆,請你盡快清理一下資源回收箱!想做二○一○年最潮「體育男」?就要留意以下至潮人物事,睇完包你潮過Lady GaGa同周秀娜!

1. 三角褲回歸

基於近兩年嘅游泳世界紀錄不斷被破,所以國際泳聯已經決定由2010年1月1日開始,禁止所有泳手再着高科技泳衣,即係俗稱嘅鯊魚戰衣出賽,一眾生產商又要大量出番傳統嘅紡織料泳衣泳褲,「低科技」沉寂兩年又再In番,老土變時髦,睇嚟好多男泳手都會着番條三角褲落水,唔使畀高科技泳衣遮晒啲腹肌咯!

2. 阿哥阿姐學散打

之前「東尼渣」電影令泰拳運動興起,個個女生都走去學泰拳燒脂。後來一代宗師葉問被搬上銀幕,又掀起一陣詠春熱潮。而○九年尾爆咗單泰國拳手挑戰中國散打高手,於網上引來唔少回響,依家唔少男女都話要學散打。男仔去學多數為咗強身健體,而女仔就話學番一招半式嚟對付男朋友喎!所以唔少拳館都開設散打班,一於食住個勢撈番筆。

3. 宅男新寵車由蘭

近年嘅體壇索女,數嚟數去都係得舒拉寶娃、A高嫂咁,但最弊佢哋都係外國人,好難奪得港人歡心啫;至於港產代表「小仙子」歐鎧淳,又好似Young咗少少,畀多兩年佢或者好啲。幸好經過東亞運之後,終於被一眾「宅男」發掘出體壇新女神,佢就係打「六個紅球」嘅「韓版栢芝」車由蘭。老實講車由蘭擁天使面孔,但又冇「港女」特質,點會唔成為二○一○年至愛先!

4. 舒拉寶娃個男友

戀愛係冇階級嘅,好似「大茄」籃球員胡查錫,雖然貴為上季冠軍湖人一分子,但要知道佢只係隊中一個大後備,你問十個香港人都未必有一個噏得出佢個名,就知佢咩質地啦!不過你咪理,又畀佢冧得掂網壇天后舒拉寶娃,借女友名氣忽然上晒位,新一年肯定陸續有嚟,大家唔恨得咁多㗎啦。

5. Slim Fit波衫蝦肥人

近年全球時裝都趨向玩「細身」,尤其係男士,上下身有咁窄得咁窄,總知就愈細愈潮啦。如今連波衫設計師都要跟風,就好似「三間牌」最新推出嘅多款國家隊戰衣,全都係緊身款式,極蝦人着,若然身形冇C朗一半咁弗嘅話,都唔使旨意Carry得到呀!

6. 一級方程式「Benz-紅」

講德國品牌又點少得平治!繼1955年之後,平治車廠決定重出江湖,除繼續向其他車供應引擎之外,仲會以正廠身份出戰2010年一級方程式賽車。而最爆係佢哋成功邀請到「車神」舒麥加復出。平治車廠有意喺車壇大展拳腳,風頭完全蓋過法拉利以及麥拿侖,至「紅」車隊非佢哋莫屬。

7. 一Click睇晒全世界

萬維網世界包羅萬有,完全改變現代人生活習慣,依家連直播節目都可以透過網絡觀賞,其實大中華地區嘅球迷,好多只坐喺監察器之前睇直播,英意西德法所有聯賽都有得睇。基於操作簡單又方便,唔少上咗年紀嘅球迷都識用,去到邊睇到邊。

8. 籃網俄國首富

喺NBA歷史上,所有球隊老闆都係美國人,未有外資可以打入呢個圈子,但不久將來歷史將會被改寫,事關俄羅斯首富普羅霍羅夫已成功收購籃網。粗略估計普羅霍羅夫身家超過一千億港元,唔少人都估佢會好似皇馬會長皮里茲一樣,以重金打造一支NBA嘅銀河艦隊。普羅霍羅夫誓必成最具新聞價值嘅老闆。

9. 南非「啲打」Vuvuzela

大家仲記唔記得喺洲際盃發出嗚嗚聲嘅南非特產打氣工具Vuvuzela呢?雖然唔少球員都希望國際足協禁止球迷吹Vuvuzela,但FIFA認為呢個係南非特色,所以已經批准可於世盃使用。唔少南非商人已經叫定製造商大量生產,打算決賽周期間賺大錢,計我話香港商人都應該有樣學樣,食住世界盃個勢造番多少「A貨Vuvuzela」,喺年宵殺出條血路。

10. 網壇新人王博迪奧

當網球迷仲談論拿度同埋費迪拿時,阿根廷球手博迪奧已靜靜起革命。現時世界排名第五嘅博迪奧有成1米98咁高,但咪以為佢淨係識開波,底線抽擊同網前處理都有相當功架,佢喺○九年最後一項大滿貫美國網球公開賽,接連拍走拿度同費達拿捧盃,人氣急升。最近博迪奧仲壓倒美斯成為阿根廷最佳運動員,預計今年必大紅大紫!

11. 六個紅球慳波鐘

桌球喺香港好受歡迎,但衰在地方細波鐘貴,唔係咁多人都消費得起。撞正對手係「碌架王」就仲慘,一盤波打成粒幾鐘,埋單好襟計。所以有人將十五個紅波縮減到得六個,以加快比賽節奏,簡稱「六個紅球」。○九年世界桌球錦標賽,大會已引入「六個紅球」為表演項目,依家好多國家正大力推廣,除咗英倫三島之外,馬來西亞、泰國、澳洲都有比賽舉行,相信呢股風氣好快就會吹到嚟香港。

12. 港足WAG攝位

攞完東亞運金牌之後,香港男足個個升晒呢,但人氣爆燈自然成為「狗仔隊」嘅頭號獵物,就好似「陳七」陳肇麒咁,佢啲情史早前連續幾日登上娛樂版頭條,球迷要睇,姨媽姑姐都要睇,十足十英超球星咁款。所以呢,新一年除咗「o靚模」橫行之外,仲要留意香港一眾WAG(女友與太太團),話唔定佢哋第日仲紅過辣妹同麥露蓮呀!

撰文:梁嘉輝、關據高