廿九歲嘅小前鋒昆田李察遜，由04年至上季都係効力紐約人，但今夏突然成為「超級人球」，不斷被球會踢走。紐約人六月率先將佢交易到灰熊，換入中鋒米列錫，但灰熊又將佢變為籌碼，換入快艇大前鋒蘭度夫。勢估唔到只係隔咗三日，快艇用佢一次過換入三名木狼球員麥臣、奇治史密夫及泰法亞，短短一個月已經轉咗三次東家。

「火」燒紐約 有仇報仇

不過，昆田嘅漂泊生涯仲未結束，一個月後木狼將佢送到熱火，所以昆田今夏輾轉由紐約出發，分別登陸過曼菲斯、洛杉磯、明尼蘇達再到邁阿密，差唔多繞咗美國一圈，總里數已超過九千公里。

幸好昆田李察遜加盟熱火後，終於都唔使再執包袱，皆因熱火正缺乏小前鋒，所以教練史普斯達都委任佢擔正。其實昆田在青年時期已經認識韋迪，兩人經常一齊打波，當時兩人已約好要在將來同隊，估唔到昆田變成「人球」後因禍得福，可以轉投熱火與老拍檔重聚，尋日更擊敗舊東家紐約人出番啖氣。