騎士有備而來，首節過後已搶到領先優勢，去到第二節更藉莫威廉士大發神威，一度將分數拉開至20分差距，奠下贏波基礎。湖人除主將高比仔外，其餘球員都發揮唔出應有水準，其中一直令湖人引以為傲嘅內線組合加素及拜林，更被奧尼爾、伊高斯卡斯及華拿祖三人合力瓦解，湖人下半場更有阿堤斯六犯畢業及奧當兩吃技術犯規被罰離場，最終慘負15分。

奧尼爾多次撞高比辣火頭

今場湖人最失禮係輸埋球品，因高比仔在比賽期間多次被奧尼爾撞倒，但未獲球證吹罰，已令賽事充斥火藥味，而湖人今場就合共被吹罰四次技犯，其中賽事剩餘4分04秒時，奧當吃下第二次技犯被逐，憤怒嘅主場球迷即時失控遷怒球證，狂發噓聲更將水樽及贊助商所派嘅黃色手指膠板掟入場內，令場面變得非常混亂，騎士教練米克布朗更要求NBA正視，因為掟水樽實在太危險。

騎士表現最好嘅兩人分別係莫威廉士及勒邦占士，前者拿下28分及7次助攻，而「大帝」就攻入26分及9次助攻，此外「巨無霸」奧尼爾重返湖人主場亦貢獻11分及7個籃板球。

本報綜合報道