今年NBA搵嚟兩大當今「波神」高比拜仁及勒邦占士擔正演出「聖誕大戰」，彌補上季未能實現嘅總決賽戲碼願望。不過兩人今場未必「互撼」，皆因湖人會派出「防守專家」阿堤斯負責凍結「大帝」勒邦占士，好讓高比仔專心進攻。阿堤斯賽前表示：「我非常期待今場比賽，相信球迷及媒體都會一樣，因為這確屬一場重量級對決。」

湖人季前簽入阿堤斯，目的就係要加強小前鋒嘅防守能力，對付如安東尼、皮雅斯、勒邦占士及卡特等強勁對手。被積遜教練委派「招呼」占士嘅阿堤斯續指：「我嘅職業生涯都係負責呢類任務，上季季後賽要盯實高比拜仁，而現時就係占士，並唔會有太大問題。」

上場對雷霆時些微觸傷左膝嘅高比仔，經過檢查後證實並無大礙，今場可以繼續披甲。

奧尼爾重返「福地」有計

除高比大戰占士外，今場另一看點落喺昔日湖人英雄奧尼爾身上，「巨無霸」將會重返斯塔普斯球場，與「大帝」聯手力敵「仇家」高比仔。奧尼爾近期飽受抨擊，更有傳佢因為幫唔到「大帝」手，即將會被騎士「叮走」，不過斯塔普斯球場向來都係「巨無霸」福地，今場唔可以睇低呢位一代中鋒。

至於另一場「聖誕大戰」魔術對塞爾特人就稍為失色，皆因「綠衫軍」塞爾特人主將皮雅斯膝關節受感染，要休息兩星期，今場會缺陣，而加納特上場因為大腿傷休戰，今場亦上陣成疑，相信擁有主場之利嘅魔術贏面會較高。

（now 670周六凌晨3時30分直播）