記：記者　趙：趙詠賢

記：唔經唔覺打壁球都打咗廿幾年，有冇諗過幾時退下來？

趙：近年忙個不停，特別係今年，真係冇乜時間諗，明年又話亞運喇，但我都考慮過慢慢退下來。不過，好肯定明年我會打亞運會，一切待亞運後至計劃吧。

歐詠芝陳浩鈴可接班

記：如果真係亞運後退休，你覺得係適當時候嗎？

趙：近呢兩年大家都可見到年輕一班已經接上，Annie（歐詠芝）、Joey（陳浩鈴）實力上已不用懷疑，或者佢哋只差一啲經驗及實戰機會。

記：那退休後，你想做乜嘢呢？

趙：最好唔使做啦，哈！哈！講笑啫！我諗唔會脫離壁球或者體育行列，或者做教練吧，不過，我都會同教練好好商量一下。

記：講吓你嘅私事吖，你同男朋友拍拖多年，有冇諗過幾時結婚呢？

趙：好多謝大家關心，正如教練同我講結婚同打波係兩回事，彼此冇衝突。我哋依家仍然好享受呢個關係，佢亦好體諒我，但依家真係未有呢個計劃，我仍然想專注壁球事業，或者明年亞運後至算吧！

記：聖誕過後，幾時重投訓練呀？

趙：我哋已經開始咗操練喇，不過，新年前仍可以輕鬆一啲，但踏入2010年就會忙不停，一月份已經有比賽，而十一月亞運會新設團體賽，好似話種子排名會以世界排名計算，所以搶分都好重要。

記：謝謝接受呢次訪問。

趙：聖誕及新年快樂！