本文重點
又到聖誕、又到聖誕……！走到街上隨處都聽到這首聖誕歌，早前在東亞運動會成為獎牌大贏家兼獎金王的壁球天后趙詠賢，比賽過後仍然忙個不停，事關她要準備聖誕禮物送贈親朋，這位「壁球女王」不惜花數萬元買了超過二十份禮物，實行要做「Santa Queen」，大派禮物，希望與家人及朋友分享喜悅，普天同慶歡度開心聖誕。
有「小旋風」之稱的趙詠賢（Rebecca）剛在香港舉行的東亞運奪得三金一銀，並袋走超過三十萬元獎金，突然成為小富婆，既然有「銀両」在手，Rebecca坦言今年買聖誕禮物也特別「手鬆」：「聖誕節係一個開心嘅日子，其實我每年都會買聖誕禮物畀家人同朋友，今年有一筆額外嘅獎金，買嘢都唔會點睇價錢，但要以實用為原則，如果唔啱用，買幾貴都係浪費，所以我會花好多時間去諗送畀佢哋嘅每一份禮物。」
大部分留做養老金
適逢這段時間很多朋友在外國回港度節，加上全年比賽結束，因此Rebecca今年要準備的禮物特別多之餘，亦可放開心情盡情「血拼」：「買嘅禮物真係好多，多到計唔晒，我諗都有超過二十份，仲好似未買齊，乜嘢種類都有，就連BB鞋仔、襪仔同玩具都在購物單之列。」不過，Rebecca都好識「慳家」，家人及男朋友的禮物可以「重手啲」，大約一千元，其他朋友的禮品就介乎「三舊水」之間。
自九歲起已打壁球的Rebecca，承認運動生涯接近黃昏，所以31歲的她坦言難得贏來的獎金將會是「退休金」：「先儲起吧，或者農曆新年會去吓旅行，但大部分都會係『養老金』嚟㗎喇。」問到買了甚麼獎勵自己？Rebecca想了想說：「好似冇喎，可能遲啲買部高質素嘅數碼相機啦！」
送贈對象 禮品
父親 名牌毛衣
母親 名牌銀包
弟弟 潮流T恤
男朋友 眼鏡
親戚小孩 玩具
親戚嬰兒 嬰兒鞋襪
親戚及朋友 精品及朱古力
■圖／文：李芷韻