本文重點
相信騎士眾將賽前都冇諗過，缺少魯域斯基嘅小牛會咁難應付！騎士尋日作客達拉斯，面對有魯域斯基肘傷缺陣嘅小牛，可惜「大帝」勒邦占士手感欠佳，命中率未達四成，加上兩位內線隊友奧尼爾及希臣亦表現低迷，結果騎士自毀長城輸95比102，五連勝就此告終。
今季鹹魚翻生嘅魯域斯基，因上回對火箭時撞傷肘部，今場只能文裝睇波，不過代其正選上陣嘅添湯馬士表現並唔失禮，攻入隊中最高嘅22分及搶得7個籃板。此外，小牛今場合共有六位球員獲雙位數得分，包括後備嘅泰利、祖殊侯活及古頓，足證缺少魯域斯基之下，其餘球員都能分擔重任。
班救兵有腹稿
相反騎士一眾主力都不在狀態，勒邦占士雖攻入全場最高25分，但23投僅9中，命中率不足四成；三名正選希臣、奧尼爾及莫威廉士合共只射入17分，完全幫唔到「大帝」，難怪一再傳出騎士即將進行換血。據悉騎士已列出增兵人選，包括巫師前鋒占美臣、勇士安東尼蘭度夫及溜馬嘅梅菲，三人都係身高達6呎9吋以上嘅低位球員，似乎係針對今季加盟但老態畢現嘅奧尼爾。
本報綜合報道