魯域斯基傷手 小牛輸後勁

小牛今季可算係火箭剋星，在十一月兩次對碰中，火箭都大敗而回，上場更輸超過30分以上，但尋日卻出現「意外」變數，小牛大腦魯域斯基喺第二節一次剷籃中，手㬹批中正在設進攻犯規陷阱嘅蘭特利面部，蘭特利「中招」後即時倒地掩嘴，而鏡頭亦影到地上有隻牙，狀甚恐怖。結果蘭特利要即時送院，並證實被批甩五隻牙！

至於傷人嘅魯域斯基亦未能幸免，佢手㬹撞傷後要入更衣室治療，但之後就冇重返賽場。賽後證實魯域斯基被牙齒所傷，軍醫幫佢洗傷口時更發現碎牙，其後要縫三針，並接受X光檢查。

火箭乘魯域斯基嘅退場，第二節將分數拉開，不過小牛第四節窮追不捨，靠添湯馬士三分球迫至加時。但進入加時就成為火箭控衞布魯克斯嘅天下，佢連番得分令小牛無力反撲，最終火箭贏116比108，復仇成功。今場火箭後備兵路維打出驚喜，攻入全場最高26分及10次助攻，而布魯克斯就有25分進帳。