伊雲斯今季以新秀第四位畀帝王揀中，初時外界對佢期望唔大，但估唔到首季踏足NBA，已成為帝王當家球星，佢喺球場上嘅表現，同實際年齡完全不符。教練韋斯菲爾認為伊雲斯有廣闊視野、冷靜頭腦同一流身體質素，絕非池中物。

助攻快感多過得分

伊雲斯初出道時被譽為「麥基迪二世」，事實上以佢嘅得分能力同身形，打二號位亦綽綽有餘，不過伊雲斯話助攻所帶來嘅快感，比自己得分更強烈，所以佢決定喺大學時期改打一號位控衞。

伊雲斯表示：「如果球隊輸波嘅話，就算一場波攞幾十分都冇意思，我個人比較鍾意策劃攻勢，同其他隊友配合，即使係單對單，防守我嘅通常都係比較矮嘅後衞，我得分亦較有信心。」

伊雲斯除咗助攻同得分了得，連籃板數字亦唔錯，平均每場搶到5個籃板球，可見呢位後生仔非常落力，就睇吓呢位新星今季能否助帝王取得超過五成得勝率。

Tyreke Evans

身　　高：1米98

體　　重：100公斤

年　　薪：361萬美元

平均得分：20.2分

平均籃板球：5個

平均助攻：5.1次