高比仔嘅手指經常受傷，今年初就曾喺對騎士時弄傷右手無名指，當時仍然効力湖人嘅孫悅就表示：「高比仔嘅手指向左傾斜咗四十五度。」估唔到高比仔今場又「領嘢」，高比仔喺首節接應法馬傳球時，右手食指受傷，因當時表情痛楚，所以教練積遜都即時將佢調離場，及後更需要提早返回更衣室治療。

加素（黃衫）今場搶得20個籃板球，木狼嘅路夫邊夠佢搶呀！（美聯社圖片）

放大圖片

紮住手指上陣都掂

不過高比拜仁向來有「鐵人」之稱，下半場亦可以重返賽場，第三節開賽後即射入一記三分球，證明紮住手指上陣都掂，而湖人亦喺此節拉開比分，單係第三節已經領先木狼16分之多，最終就係憑該節優勢，以104比92擊敗木狼。高比仔今場攻入20分及5個籃板球，而加素就射入17分，並搶下20個籃板球，同屬贏波功臣。賽後高比仔指出比賽時的確非常痛苦，只係一直憑意志捱過。

今場勝利對高比仔嚟講別具意義，皆因自○四年後，湖人都未試過造出十一連勝，而上次正正係由奧尼爾帶領所創。一向以來高比仔都畀人話冇咗奧尼爾就唔掂，但繼上年攞得首枚冇奧尼爾嘅冠軍指環後，如今又造出連勝紀錄，高比仔終於可以擺脫靠晒奧尼爾嘅污名。