港產魔女 林嘉澄

項目︰排球

今屆香港女排表現一啲都唔輸蝕，一眾女將面對勁旅中國依然左飛右撲，贏得唔少掌聲！其中喺學界打響名堂嘅「美少女」林嘉澄亦有落場一拚。

可愛教主 福原愛

項目︰乒乓球

福原愛多年來大受歡迎，確實有原因的。呢位「卡娃兒呢」抵港後大派甜到漏笑容，打波失準又識嘟嘴，搞到一眾港男中晒招，可愛果然係發自內心。

韓版栢芝 車由蘭

項目︰英式6個紅球

「韓版栢芝」車由蘭甫出場已令人眼前一亮，其柔弱得嚟帶小小楚楚可憐嘅氣質，不禁令人聯想起一眾催淚韓劇嘅女主角。車妹一個東亞運，奠定體壇女神地位。

思鄉情懷 姚彥

項目︰乒乓球

今屆隨中國乒隊來港嘅姚彥，散發出陣陣鄉村氣息，見到佢不禁令人有思鄉嘅情懷。喺呢個充斥污染嘅社會之中，已經好難見到如此清麗脫俗嘅女子球手。

性感野貓 金佳映

項目︰9號球

雖然「性感野貓」金佳映於今屆賽事收起性感，但真金不怕洪爐火，金佳映落場依然風韻猶存，仲寶刀未老攞埋金牌，保住「九號波后」嘅金漆招牌。

小仙子 歐鎧淳

項目︰游泳

泳隊萬人迷歐鎧淳有「小仙子」之稱，聽個名就知道靚爆泳壇啦，而淳淳今屆成績亦非常突出，合共攞咗兩銀兩銅，果然睇得又游得！