本文重點
東亞運跳水次日賽事，中國「夢之隊」再掃三金！中國選手屈琳及劉嬌喺女子三米跳板分別取得金銀牌。屈琳發揮可謂相當穩定，最終以總分364壓過隊友劉嬌贏得金牌。至於銀牌得主劉嬌表現失準，於第二跳犯下嚴重錯誤，令排名曾跌落第七位，好彩最後都能夠從後趕上，以總分309.85搶番一面銀牌。其實兩位小妹妹於首日舉行嘅女子一米跳板賽事已經包辦冠亞軍，實力明顯超晒班。
今日直指「十全金」
男子一米跳板繼續由中國隊贏得冠亞軍，李世鑫以由頭帶到尾姿態贏得金牌，銀牌得主為吳明鴻。最後女子雙人十米高台，王鑫及汪皓延續國家隊強勢，以360.54分再贏金牌。王鑫賽後就話自己正處發育時期，身體比兩個月前嘅全運會已長高唔少，體形變得修長令佢演繹動作更為優美。暫時兩日六面跳水金牌全部由國家隊擸晒，向東亞運「十全金」局面又邁進一步。