中國網民再次發揮群眾力量，「勁煲」姚明個火箭隊友麥基迪！ＮＢＡ昨公布明星賽投票最新形勢，今季一場都未打過嘅火箭得分後衞麥基迪，竟然喺西岸後衞票數排第二，明年二月嘅明星賽有機會正選登場！美國傳媒分析，投票結果係中國球迷「愛屋及烏」，姚明受傷冇得選，惟有揀佢隊友麥基迪。
ＮＢＡ明星賽將於明年二月十四日（香港時間二月十五日）喺達拉斯舉行，ＮＢＡ昨公布第一階段投票結果，高比拜仁以六十九萬二千五百多票成為票王，最意外係今季因傷冇上過陣嘅麥基迪，都掹車邊入圍。
暫時西岸票數領先嘅首發陣容，分別係高比仔、麥基迪、安東尼、魯域斯基同史杜迪米亞。東岸方面，熱火後衞韋迪得票最多，有六十七萬二千多票，力壓第二位嘅勒邦占士，其餘三人分別係卡特、加納特同「魔獸」杜域侯活。
麥基迪對於自己今季毫無建樹，但仍有機會打明星賽感到意外，佢話會努力操練，希望盡快復出答謝球迷支持。