離開三年，「費城之子」艾佛遜終在尋日再披76人「3號」戰衣，迎來回歸首戰！雖然76人今場以83比93不敵金塊，遭逢常規賽十連敗，但戰果已經唔重要，皆因全場球迷都為艾佛遜回歸而雀躍，而「AI」亦獲得正選機會，上陣37分鐘貢獻11分、6次助攻及5個籃板球，對休息多時嘅「AI」嚟講，表現已算合格。
艾佛遜回歸76人尋日首度落場比賽，賽前76人亦隆重介紹「AI」登場，當艾佛遜出場時，佢竟跪地親吻76人主場館地板，代表願意効忠76人至退休為止。唔少球迷今場都自製橫額及標語牌入場撐艾佛遜，例如寫上「費城之子艾佛遜」及「歡迎回家」等，場面倍感溫馨。
艾佛遜經歷季初嘅困境後，今場亦甘願作「綠葉」角色，鮮見以往風格作個人突破，反而整場比賽多作中距離投射及分波，協助伊古達拿及楊格進攻。
雖然「AI」回歸未能協助球隊贏波，但艾佛遜賽後表示，76人仍有希望打入季後賽，球隊將會找回勝利節奏。