我係南華Die Hard粉絲，一出到足球場，係人都知我叫佐敦。我撐本地波，唔係齋噏，而係每當香港足球隊出賽，我都一定入場支持，仲經常為港足嗌到聲嘶力竭，港足一入波，我就更加興奮到想衝出球場。
球迷唔易做，無間斷入場為港足打氣，開支其實幾龐大，尤其係我哋升斗市民。所以我打算趁近期賽事，賺番多少經費，由早前亞洲盃香港對日本，到今次東亞運港足比賽，我準備咗五百支特區旗，以低價賣畀相熟球迷，所得費用作為日後為港足打氣用途。
不過今次為港足打氣遇到唔少阻礙，就係賽會竟然唔畀我帶鼓入場，平時本地波都畀帶，東亞運就唔畀，真係唔明！搞到我要敲打垃圾桶代替打鼓，雖然我知道咁做係唔啱，但真係忍唔住手，睇波唔打鼓，邊有氣氛㗎！