香港男足今晚將在小西灣運動場迎戰中國奧運隊，只要唔輸四球或以上，香港都可以殺入四強。不過，港隊教練金判坤及國奧官員都表明，一定唔會打「默契波」令中、港齊齊出線，金判坤更呼籲香港球迷入場支持，見證香港隊贏中國！
國奧隊上場以○比三大敗於南韓腳下，現時得零分包尾，在Ｂ組形勢最差，南韓及香港則有三分在手，港隊以三個正球差居首。中國出線只有兩個可能，一係淨勝香港四球或以上，就可與南韓攜手出線，而另一個可能就係以五比二贏波或大比數淨勝香港三球，則中國與香港就可以憑較佳得球雙雙晉級，所以今場的確存有「默契波」嘅可能。
雙方表明冇講掂數
不過，港隊教練金判坤昨在掃桿埔練波時已表示，唔會因輸少過四球都出線而放軟手腳，今場目標依然係全力爭勝，答謝入場球迷嘅支持，絕無製造「默契波」嘅意思。
事實上，金教練本身來自南韓，佢上場領港隊大炒南韓後已指出情義兩難存，所以在情在理佢都會盡全力阻止中國出線。而據內地傳媒報道，國奧一名官員亦表明唔會考慮靠「默契波」晉級，因為咁樣出線並唔光彩。
陳肇麒梁振邦缺陣
港隊今場會缺少遠赴倫敦跟隨熱刺試腳嘅射手陳肇麒，以及疑似患上豬流感已離隊嘅中場梁振邦，預計金判坤會改打451陣式，只派巢鵬飛作單箭頭攻堅。
此外，金判坤指賽前已提醒球員，中國上場大敗於南韓○比三，並唔代表國奧隊實力咁差，只因南韓首戰恥辱性被港隊大炒，先打出雙倍拚勁爭回面子，所以佢賽前呼籲球迷入場支持港隊，而截至昨日為止，賽事仍有二千門票未賣出。
今日賽程
香港Vs中國（B組初賽）
時間：7:00pm
地點：小西灣運動場
票價：$50、$25（特惠票）即場發售