本文重點
金塊強勢持續，作客馬刺一樣冇有怕！憑安東尼貢獻34分及7個籃板球，金塊終以106比99擊敗馬刺取得三連勝。金塊周二早上會對76人，76人尋日以105比106，一分之微不敵山貓，不過「AI」艾佛遜好大機會復出再為76人打江山，或者會有沖喜作用。
「甜瓜」安東尼繼續成為贏波功臣，連埋今仗嘅34分在內，佢暫時超逾高比拜仁，成為聯盟得分王，平均每場射入30.4分，並成為唯一一個今季保持每仗射入超過20分嘅球員。
其實除咗安東尼，金塊仲有四名球員得分達雙位數字，比立斯18分、JR史密夫17分、連尼12分及羅臣11分，令到主場嘅馬刺都冇晒符，即使鄧肯孭起得分責任，射入26分更於半場領先金塊，但仍然改變唔到金塊最終贏波嘅事實。
艾佛遜周二現身
金塊個個着火，周二朝早作客76人，照計都唔會出意外，可以贏波而回。不過，76人有好事沖喜，雖然球隊尋日以一分不敵山貓輸得唔抵，但重返76人嘅「戰神」艾佛遜已經投入球隊操練，球隊士氣大振，據聞佢會喺呢場對金塊復出，對番上季嘅舊隊友安東尼。
連最近有怨言話自己冇正選嘅布蘭特，都對「AI」回歸非常期待：「佢有一日嘅適應時間，跟住，我哋會從此再崛起。」