本文重點
根據美國《體育畫報》報道，NBA總裁史端早前接受訪問時，竟語出驚人話十年後NBA可以接納女將參與，照推斷即是「大帝」勒邦占士卅四歲時，將有可能同女將合拍作戰，不過占士尋日受訪時就同史端唱反調，更唔敢想像自己未來有女搭檔！
史端估十年後可實現
史端早前被記者問到NBA將來會否加入女將時，竟立即說可能性好大，仲估計十年後就會出現。其實史端上任以來一直甚為重視WNBA，可惜WNBA近年有走下坡迹象，無論人氣及觀賞價值都欠佳，所以若然未來真係有女將有條件參戰NBA，肯定可以帶番起女子籃球嘅熱潮。
聽落幾有噱頭，但「大帝」就似乎唔多認同，佢尋日對公牛時表示：「十年後？到時我將會卅四歲，而我估計我仍會留在NBA，到時進步不少，但實在太遙遠，我暫時唔敢想像。」「大帝」隊友安東尼柏加就大表反感，雖然佢妹妹簡迪絲已係世界頂尖籃球員，但佢覺得男女身體素質嘅差異，事情永遠唔會發生。