籃網今季已創下ＮＢＡ史上最差開局18連敗，所以教練法蘭早前已被炒魷，改由球會總監雲迪維治領軍，而前中國男籃教練夏里士則當副手。雲迪維治果然冇令球迷失望，首次掌帥就在陣容上略作變動，改派哥特尼李爾擔任正選，結果佢打出今季代表作，全場16射11中，個人攻入27分。

籃網取得今季首捷，球迷高舉1-18橫額祝賀。 （美聯社圖片）

放大圖片

易建聯傷愈可候命

不過，哥特尼李爾未算最Sharp，今場表現最好嘅係愈見成熟嘅中鋒布克盧比斯，佢交出全場最高嘅31分、14個籃板球及２次封阻，成功助籃網喺第四節拉開分數，以97比91贏得今季首場勝仗。若不計季前熱身賽，籃網對上一次贏波已要追溯到今年四月十三日，亦代表籃網要相隔235日先再喺正式賽事獲勝。

新帥雲迪維治賽後表示：「我為球員感到高興，現在他們終可放下包袱了。」籃網贏波後，總算避開另一ＮＢＡ恥辱紀錄，連續23場不勝，此外另一好消息係大前鋒易建聯已經傷愈，據悉佢已準備就緒隨時復出。