非種子換亨利赦免

據西班牙語ESPN報道，世界盃分組賽抽籤前，各國已開始暗戰，除法國願意成為非種子球隊，以換取亨利於決賽周唔使停賽及抽好籤外，阿根廷、美國同國際足協亦有內部交易。國際足協遲至抽籤前兩日先公布種子球隊及抽籤規則，就係因為傾唔掂數。

該報道亦指出，中北美洲曾向國際足協會長白禮達爭取種子席位，因為上屆世盃墨西哥都係種子球隊，而美國喺近年世界盃及今年洲際國家盃亦有出色表現，但白禮達願意以二○一八世界盃主辦權換取兩國妥協，美國同墨西哥權衡利益後決定接受國際足協安排。

此外，國際足協第一副主席格蘭當拿本身係阿根廷人，所以佢祖國亦獲得好處，除被罰停賽嘅領隊馬納當拿獲得從輕發落外，近年喺世界盃決賽周欠缺表現嘅阿根廷亦獲得種子席位。有關人士已否認有關報道。

碧咸祖父過身down晒

至於今次抽籤嘉賓，最矚目一定係「萬人迷」碧咸，佢今次嚟南非目的，係幫英格蘭申辦二○一八年世界盃拉票，據聞「咸哥」甚有外交家風範，表現相當出色，更識做地送波衫畀白禮達孫女，不過「萬人迷」抵達南非後獲悉祖父去世消息非常傷心，勢必影響其當抽籤嘉賓心情。