本文重點
開局17連敗，籃網終於將隊名刻在ＮＢＡ歷史冊上！雖然籃網尋日對湖人陣前易帥，但基於球隊實力與湖人差距太大，結果以87比106大敗，寫下開咧17連敗，平了熱火在八八年及快艇在九九年所創下嘅最差開局紀錄。若然籃網喺周四輸埋畀小牛嘅話，將會獨佔污名。
籃網喺賽前數小時辭退教練法蘭，隨即任命助教巴里斯暫代領軍，不過士氣低沉嘅籃網又點頂得住實力雄厚嘅湖人呢，最終湖人輕鬆以106比87贏波。今場僅上陣29分鐘就攻入30分嘅高比拜仁全場17射11中，其中三分球８射５中。隊友加素亦貢獻20分、９個籃板球及７次助攻。而籃網打得較好嘅有中鋒布克盧比斯，攻入26分及搶得12個籃板球。
球員大感沮喪
對上兩次寫下17連敗羞恥成績，分別係八八年嘅熱火及九九年嘅快艇，暫代教練巴里斯賽後表示：「球員早上得悉教練法蘭離隊心情有所影響。」而主力迪雲夏里士就非常沮喪：「冇人會想見到呢項紀錄誕生，尤其係身在其中。」
■本報綜合報道