據《紐約郵報》報道，紐約人已派出球探跟進麥基迪嘅傷病情況，若然證實佢身體無礙，就會出手斟介。其實紐約人收留麥基迪並非壞事，皆因「T-Mac」嘅巨額合同明年就會屆滿，並唔會影響佢哋嘅薪酬空間，妨礙明年羅致勒邦占士或韋迪等球星，而且麥基迪始終係一位星級球員，獲得佢加盟嘅話，一定有所回響，賣波衫都可以賺番筆。

火箭換入莫比利套現

美傳媒估計，紐約人會搵已退休嘅莫比利作為籌碼，去換取麥基迪。雖然莫比利已唔會再比賽，但就係咁先吸引，皆因擁有莫比利嘅球隊，可以根據條款向保險公司申請其900萬美元嘅薪酬賠償，而且火箭希望重組，減少球隊嘅奢侈稅款，換走麥基迪一定係最佳選擇。

戰果方面，尋日魔術喺「東岸大戰」輕鬆以93比76擊敗鷹隊，現時以12勝4負傲視東岸。 本報綜合報道