今季至出位嘅新人真寧斯，尋日終於遇到剋星，佢就係馬刺後備控衞佐治希爾！尋日公鹿作客聖安東尼奧挑戰馬刺，已經成為公鹿領袖嘅真寧斯整場受制於活力十足嘅佐治希爾，結果發揮欠理想下全場僅21射6中得12分，更錄得五次失誤，「龍頭」啞火，公鹿最終以98比112大敗於馬刺手上，結束三連勝。

公鹿今季放走謝法臣，而主將米高列特及波格特又輪流受傷，但開咧成績竟然異常理想，都係多得「新人王」真寧斯連番爆發。不過，佢尋日表現認真失色，初段挑戰柏加時問題不大，但當馬刺教練普波維治一放「防守專家」佐治希爾出場後，後者即嘜到真寧斯一戙都冇，喺外線冇舒服出手機會，想作突破又被佐治希爾緊纏，之後更被佢大力封阻，真係乜信心都冇晒。

數據難睇 公鹿大敗

結果真寧斯全場只交出21射6中，得12分及5次失誤嘅慘烈數據，都算係開咧以嚟個人最差一仗。馬刺今場由頭帶到尾之下，以112比98贏波，除佐治希爾表現出色外，老將鄧肯亦拿下「雙雙」24分及12個籃板，而後備兵邦拿亦貢獻23分，同屬贏波功臣。馬刺贏波後總成績6勝6負，而公鹿則8勝4負，排於東岸第五位。

雖然公鹿被馬刺終止三連勝，但慶幸射手米高列特終於在今場復出，後備上陣11分鐘，但佢嘅狀態認真不堪入目，罰球竟然6射1中，對呢位神射手嚟講都算少見。

■本報綜合報道