兩隊近年都換入不少潛質新血，組軍政策都以新人掛帥，前屆狀元奧登同上屆狀元戴歷羅斯，季初都被批評狀態不濟，打唔出應有水準，幸好二人近期齊齊谷底回勇；拓荒者中鋒奧登目前於命中率同封波分列NBA第二、三位，而公牛控衞戴歷羅斯昨日對金塊亦攻入二十八分的今季個人新高，今仗兩位最有前途新人對壘，值得期待。

拓荒者昨以二十八分差距擊潰木狼，但事實上球隊仍未出盡全力，事關五位正選上陣時間無幾，陣上搏殺最長時間的萊爾都只角逐三十二分鐘，有理由相信拓荒者刻意留力「鬥牛」。其次，亦反映拓荒者兵源充足，正選後備一樣夠殺，公牛相比下明顯輸蝕，想贏波難度甚高。

籃網十三連敗輸到癲

另外，籃網輸波輸到癲！球隊昨日雖然有明星控衞夏里斯復出，不過主場對東岸排尾二的紐約人仍以九十一比九十八敗陣，開季至今十三戰全敗，難怪陣中新星羅拔斯都話精神受到極大折磨，遲早發癲！NBA史上開季最長連敗為熱火同快艇「共同擁有」之十七連敗，籃網未來四仗全部作客分別對金塊、拓荒者、帝王同湖人，要破紀錄絕對係「指日可待」！