迪肯尼奧 面惡心善

外表兇悍、脾氣火爆嘅迪肯尼奧其實係球場上不折不扣嘅真君子。二○○○年十二月韋斯咸對愛華頓，當時愛華頓門將保羅謝拉特衝出禁區攔截對手後，受傷倒地不起，韋斯咸球員趁機送出一記傳中波畀迪肯尼奧射空門，但佢卻用手接下皮球，令球證可以吹停比賽，畀軍醫入場了解保羅謝拉特傷勢。最終呢場比賽雙方打和一比一，韋斯咸失兩分，迪肯尼奧失去一個入球機會，但卻贏盡球壇掌聲，並獲得國際足協頒發公平競技獎。

科拿 反指球證錯判

亨利出「魔鬼之手」，賽後先至承認，但有一個球員敢於犧牲自己球隊利益，維持體育公平原則。邊個咁經典？咪科拿囉！九七年利物浦對阿仙奴嘅英超聯賽，科拿殺入禁區，看似被施文勾跌，球證直指十二碼點。

但科拿起身後，即時向球證表示自己冇被勾跌，無奈球證唔衰得，堅持判罰。科拿主射時刻意射得差，讓阿仙奴門將施文救出，之後才由麥卡迪亞「執死雞」。科拿因此事件，當年獲歐洲足協頒獎讚許。

馬克泰萊 犧牲小我

澳洲板球擊球手馬克泰萊，在一次與巴基斯坦比賽中，第二賽日取得職業生涯最高分數（runs），這紀錄亦追平咗畢特文所創嘅最佳澳洲紀錄，只要泰萊喺下賽日再拿多42分，就可以打破羅拉嘅375分世界紀錄。

不過，泰萊為咗球隊能夠提早獲勝，休息時向隊友表示，唔應該拉長比賽而令自己打破紀錄。結果球隊獲勝後泰萊的確破唔到紀錄，但賽後就獲隊友及傳媒大讚佢夠無私。

約翰蘭迪 友情至上

澳洲著名田徑運動員約翰蘭迪，躋身了1956年墨爾本奧運會男子1500米決賽，但當日賽事不幸地出了意外，其隊友朗奇勒在早段被其他對手踩中腳跟跌倒。約翰蘭迪得悉後竟返後扶受傷隊友起身，而自己及後亦繼續比賽。

結果約翰蘭迪咬緊牙關，大落後下窮追不捨，最終在最後幾米迎頭趕上，贏得比賽。佢賽後因而獲得國際奧委會嘉許，指出佢能夠發揮出真正嘅奧林匹克體育精神，其他運動員應向其學習。

魯迪克 失盃贏掌聲

二○○五年，美國網球手魯迪克同西班牙嘅華達斯高，齊齊殺入羅馬大師賽決賽。雙方打得難分難解，去到最後一盤嘅最後一分，華達斯高竟然開個雙錯誤發球，球證即時判魯迪克贏出呢場比賽。

雖然已經取得錦標，但魯迪克卻體現出至高體育精神，佢向裁判表示，華達斯高嘅第二發球其實並冇出界。球證接受魯迪克嘅意見，畀華達斯高再開第二發球。最後魯迪克雖然輸掉比賽，卻贏盡掌聲。

勝之不武 雲格Say No

阿仙奴領隊雲格一向風度翩翩，原來早喺十年前大家已經見識過佢嘅君子風度。當時阿仙奴喺足總盃第五圈同錫菲聯交手，當兩隊踢成一比一嘅時候，錫菲聯見有球員受傷，特意將個波踢出界，點知阿仙奴開界外球卻冇將控球權畀番對手，簡奴更長驅直進，然後傳交奧華馬斯射入，最後阿仙奴贏二比一完場，雲格賽後認同呢個入波有問題，主動要求重賽，結果阿仙奴於重賽以相同比數淘汰對手，奧華馬斯一樣有波入。

朗治+歐文斯 真心英雄

一九三六年柏林奧運會，於跳遠賽事中出現一對真心英雄，叫世界動容。美國超班選手歐文斯，係各項田徑比賽大熱，而佢於跳遠中遇着強勁德國運動員朗治。雖然雙方係競爭對手，但當歐文斯於頭兩次試跳都犯規嘅情況下，朗治竟然挺身而出，走埋去歐文斯身邊叫佢冷靜，並重新檢討、改善自己助跑距離。得到提示後，歐文斯果然脫胎換骨，最後並取得金牌，而朗治就屈居亞軍。賽後雙方手拖手接受觀眾歡呼，場面感人。

尼克勞斯 分享榮譽

美國高爾夫球巨星尼克勞斯，不但技術出神入化，而且球品一流，可以話係大師中嘅大師。一九六九年萊德盃由美國隊鬥英國隊，當時雙方代表尼克勞斯同積奇連鬥到最後一洞，雙方都有機會平標準桿。當尼克勞斯打入一個四英尺靚波，於洞內拾球後竟然唔小心踢中對手球位標誌，而該marker僅離洞口兩英尺。因為錯在自己，尼克勞斯不須對手打球進洞，就表示雙方都係冠軍，最終該屆萊德盃由兩國分享錦標。

李斯特城好心有好報

○七年英聯盃第二圈李斯特城對諾定咸森林，李斯特城後衞奇里夫奇勒喺半場休息時，突然在更衣室內暈倒，由於擔心佢有生命危險，球證決定腰斬賽事並擇日重賽，當時森林領先一比○。去到重賽嘅時候，李斯特城球員為咗公平起見，上半場一開波便全部企晒喺度，唔去搶波，讓森林門將保羅史密夫輕易帶球推進射入一球，回復番腰斬前嘅原本比數，或者好心有好報，李斯特城最終反勝對手三比二晉級，全體球員都可稱為君子。