魔術上季一鳴驚人搞掂騎士殺入總決賽，今季開咧後總算冇令球迷失望，尋日贏埋塞爾特人，總成績已去到十勝三負，暫列東岸第二。唔少美傳媒指出魔術勝在板櫈深度夠，比起勁敵湖人及騎士更強。事實上魔術一至五號位嘅替補都有番咁上下，其中教練雲根迪季前簽入「白朱古力」積遜威廉士，更加係得意之作，近期佢藉尼爾遜受傷首次擔正，風采依然。
為魔術出山爭標
相信唔少球迷都奇怪，點解積遜威廉士去年會選擇退休，畢竟當時佢只係三十二歲，仲係當打之年。
但原來呢位「壞孩子」老婆去年懷住第三胎時，情況並唔穩定，如果要全家搬往洛杉磯嘅話（當時積遜威廉士剛被換到快艇），隨時更唔樂觀，所以佢就選擇家庭放棄事業，毅然退休。
結果佢老婆亦為佢誕下一個健康女兒，而積遜威廉士亦冇完全荒廢籃球事業，佢每星期都有同一啲退役球員打衞生波，以保持比賽狀態，難怪季前獲多支球隊招手，而積遜威廉士就揀咗最有爭標能力嘅魔術。
其實雲根迪揀「白朱古力」，除咗佢仍具實力之外，雲根迪亦希望積遜威廉士可以將佢嘅變化經歷，感染到正選後衞尼爾遜。尼爾遜出道以來比較心浮氣躁，同年少嘅「白朱古力」非常相似，不過後者自從成家立室後，已經改善晒花巧打法及臭脾氣，之後仲協助熱火攞埋總冠軍，所以積遜威廉士絕對係尼爾遜嘅最佳學習對象。
Jason Williams積遜威廉士
外號：白朱古力
位置：控球後衞
年齡：33歲
身高：6呎1吋
曾効力球會：帝王、灰熊、熱火、魔術
個人成就：
99年新秀一隊（帝王）
06年總冠軍（熱火）