老飛人跳投奠勝

塞爾特人今場可謂輸喺自己手上，幾位得分點如皮雅斯、拉舒華萊士及朗度等手感極差，所以首節已經落後魔術16分之多，成為致命傷。雖然塞爾特人及後積極追分，一度於最後一節追成78平手，但卡特於最後關頭跳射得手，加上其後有劉易斯兩罰全中奠定勝局，最終魔術以83比78擊敗塞爾特人。

今場卡特射入全場最高嘅26分，另外亦貢獻6次助攻及6個籃板球，表現最Sharp，佢賽後表示：「很開心能喺今場賽事被委以重任，於這種競爭激烈嘅賽事中，你永遠唔想輸，好高興睇見球隊堅持到最後而獲得勝利。」至於隊友劉易斯亦表示，今場勝利係屬於卡特。

命中率不足三成半

塞爾特人多名主力都失準，縱然皮雅斯獲得全隊最高嘅21分，但佢今場19射僅得7中，表現唔合格。此外，「綠衫軍」今場命中率亦僅得34.5%，而三分球更加19射得2中，投射失靈自然要付上輸波代價。

本報綜合報道