今季開咧以嚟一直養傷缺陣嘅加素，尋日終於回歸賽場，並以正選身份對公牛。賽前積遜教練表示，只會派加素上陣廿五分鐘左右，因為驚佢身體未完全回復，但加素開賽後已證實「冇問題」。

或許餓波太耐嘅關係，加素首節已打得非常有火，取得10分及4個籃板，面對今季「籃板王」諾亞一啲都唔輸蝕。湖人上半場已有雙位數嘅領先優勢，第三節完結後更拉開17分距離，最終以108比93大勝公牛，贏得非常輕鬆。加素全場上陣35分鐘，15射9中得24分，並有13個籃板及3個助攻，表現屬全場最佳。

累積得分過渣巴頭

至於高比仔雖然手感一般，但其他方面都表現出色，個人攻入21分、9個籃板及8次助攻。而佢射入21分後，常規賽生涯總得分亦達到24,182分，終於超越「天鈎」渣巴嘅24,176分，成為湖人史上常規賽得分第二位。現時高比仔與湖人史上得分最高者謝利韋斯，只差1,010分，如無意外今季都可以刷新紀錄，成為湖人史上得分王。