一年一度澳門格蘭披治大賽車又殺到，今日起一連四日Engine聲又響遍濠江！每年大賽車都係車迷同旅客盛事，除咗睇車，亦順道到呢個已升格為「東方拉斯維加斯」嘅城市吃喝玩樂一番。今年大會更打正旗號將賽車同美食掛鈎，喺大賽車期間繼續舉辦澳門美食節，更喺多處美食地點，例如議事亭前地及氹仔官也街擺放大型電視播放賽事，車迷可以一邊歎美食，一邊睇賽車，爽！
澳門大賽車今年已係第五十六屆，每年都係港澳車迷一大盛事，三大賽事澳門格蘭披治三級方程式大賽、澳門格蘭披治電單車賽及國際汽聯世界房車錦標賽（東望洋大賽）固然係車迷必睇之選，仲有強勁嘅支援賽包括澳門ＧＴ盃、太平洋寶馬方程式、路車挑戰賽等，亦係不容錯過嘅大激鬥。
配合美食節煙花表演
今年大賽車一如以往，都係同澳門多個吸引遊客嘅活動一齊搞，當中最吸引嘅梗係美食啦。澳門美食節喺澳門大賽車期間，會喺西湖廣場舉行，而且喺廿二日晚，仲有煙花表演添，睇完賽車去歎番餐再睇煙花，一樂也。
睇完賽車食餐勁當然係好提議，如果想邊睇邊食又得唔得呢？大會今年喺關閘廣場、祐漢公園、議事亭前地、三盞燈圓形地同氹仔官也街，都會設置大電視，播放賽車戰況，真係諗起都正。
尋找另一個周秀娜
呢啲地方全部都有好嘢食，關閘附近嘅花甲豬骨煲天氣凍凍哋最啱，祐漢公園有好多具鑊氣嘅街邊小炒，議事亭前地有幾多葡國美食唔使多介紹，三盞燈附近嘅緬甸魚麵同咖喱，諗起都舔舔脷，仲有官也街水蟹粥同蜆芥鯪魚球，真係千祈唔好錯過。
除咗美食，每年大賽車當然唔少得賽車女郎啦，唔講唔知，原來好多做過澳門大賽車嘅賽車女郎之後都紅咗，當中表表者係G模掌門人周秀娜，佢喺○七年做過Racing Queen，大家今年又落足眼力，睇吓搵唔搵到未來之星喇！
撰文：周兆年、黃兆崑