季前乏人問津，頗為「折墮」地加盟灰熊嘅艾佛遜，如今又要抉擇新東家，因「AI」已表明希望留在NBA打波，所以估計佢唔會為錢到歐洲或亞洲落班。此外，因艾佛遜妻兒居住在費城，所以佢亦希望留在東岸，最有空缺收留呢位壞孩子，就係紐約人。
紐約人 加盟機會：★★★★
據《hoopshype》消息，紐約人希望搵艾佛遜作杜漢替補，因紐約相近費城，所以艾佛遜已透過經理人表示樂意加盟，並指出自己素來欣賞紐約人教練迪安東尼嘅戰術。基於紐約人已放眼2010年，所以大有機會簽「AI」一年，賺番啲賣衫錢
黃蜂 加盟機會：★★★
據《雅虎體育》表示，因為「蜂王」基斯保羅剛弄傷腳踝，有可能休息超過一個月，所以黃蜂打算請艾佛遜幫手，暫時代替「CP3」嘅領軍位置
退休 機會：★★★★
艾佛遜離開灰熊嘅主因，係球隊未有兌現承諾派佢打正選，但以「AI」現時嘅狀態，確實難以擔上任何一支球隊嘅主力位置，自然難搵落腳地。再者，「AI」出名麻煩，大部分球隊就最怕麻煩友，所以艾佛遜亦大有機會冇班落而黯然退休