本文重點
「AI」艾佛遜與灰熊嘅鬧劇終於結束，因「AI」離隊超過十日，灰熊忍無可忍下終於與艾佛遜經理人達成協議，以低價買掉「AI」一年合同，正式裁掉呢個麻煩友！艾佛遜只係披甲三仗就憤然離隊，加上佢又唔肯面對現實，指明要打正選，所以大部分球隊都無意簽入呢位臭名遠播嘅老將，一代MVP隨時就此黯然退休。
外號「答案」嘅艾佛遜因私人理由，早前獲得灰熊批准暫時離隊，不過艾佛遜一走就十日，而且亦冇再同球會聯絡，所以灰熊尋日就向艾佛遜經理人發最後通牒，要佢盡快表明意向。數小時後雙方隨即宣布達成協議，雖然未有公布細節內容，但據悉灰熊只係用低價買斷「AI」一年310萬美元嘅合約，而「AI」就可以在一至兩日後回復自由身，改投其他球隊。
第一個被裁MVP
今次一代戰神被裁掉，亦成為NBA成立MVP（最有價值球員）獎項五十五年以來，首位賽季中途被裁嘅MVP，聽到都令人心酸。
雖然艾佛遜已透過經理人向傳媒透露，自己仍希望在NBA比賽，最理想當然係加盟一啲具競爭力嘅球隊，爭取首枚冠軍指環，但唔少球會總經理已紛紛回覆傳媒，表示無意簽入呢位卅四歲老將，相信主要因為「AI」已無復當年勇，實在難給予其正選之位。加上艾佛遜去到邊度都同教練發生摩擦，76人嘅拉利布朗、金塊嘅卡爾同只與「AI」合作三場嘅灰熊教練賀連斯，都曾經批評艾佛遜嘅態度，所以呢位○一年MVP，冇班落黯然退休好可能係最後「答案」。