本文重點
【本報綜合報道】丹佛金塊五個月前喺主場被洛杉磯湖人淘汰無緣總決賽，呢個屈辱一直記在心中，尋日兩軍自季後賽後首度碰頭，金塊以105比79大炒對手，成功大報復。今場高比仔下半場竟然「捧蛋」，搞到湖人第三節恥辱性僅得8分，成為輸波關鍵。
輸波關鍵 第三節得8分
金塊上季被湖人擯出局，球員一直深深不忿，所以今場開賽後已積極搶攻，但湖人喺上半場打得唔錯，高比拜仁仲射入19分，兩軍分數「咬住上」。不過，勢估唔到高比仔下半場大跌Watt，一分都攞唔到，結果連累湖人整個下半場加埋只得23分，其中第三節更只得8分，被金塊追平球會史上單節失分最少紀錄；相反湖人就創下球會史上單節得分第二低紀錄，最低紀錄於七七年對公牛時創下，當時單節得6分。
黃蜂輸波CP傷出
最終金塊以105比79大炒湖人，賽後高比拜仁亦顯得非常無奈：「或者有加素我哋會表現好啲，但金塊今日確實打得好好，值得取勝。」
另一方面，新奧爾良黃蜂新帥保華尋日首執教鞭即嘗敗績，球隊以78比86不敵波特蘭拓荒者，最慘係「蜂王」基斯保羅（CP）於今場弄傷左足踝被抬離場，預計要休息一至兩周，黃蜂真係諸事不順。