偷拿殊橋拍節目賺錢

相信唔少朋友都記憶猶新，奧尼爾早前曾經同ABC電視台合作，製作咗一個名為《Shaq Vs》節目，由奧尼爾親自與其他運動健將比併，最矚目嘅當然係佢挑戰「飛魚」菲比斯，成為熱播片段。不過，原來呢條節目橋係奧尼爾從前隊友拿殊身上偷番嚟，「巨無霸」又一次出賣朋友。

話說兩人上年仲係鳳凰城太陽隊友，拿殊有一次就同奧尼爾分享，打算搞一個電視節目，與其他運動精英比較，意念甚為創新。不過，勢估唔到拿殊籌備之際竟鬧雙胞胎，奧尼爾好快就推出咗一個意念與拿殊一模一樣嘅《Shaq Vs》，搞到拿殊火都嚟埋。

加監製名兼賠錢了事

事件被揭發後，奧尼爾死唔認偷橋，仲話佢嘅意念同拿殊唔同，後者只係想同其他運動員訓練，根本冇挑戰性質。不過拿殊又點會罷休，佢就徵詢法律意見，誓告奧尼爾偷橋。可能奧尼爾亦自知身有屎，就將《Shaq Vs》嘅監製一欄加埋拿殊個名，而美國傳媒亦估計「巨無霸」畀咗一筆可觀金額拿殊作和解，所以奧尼爾已用行動證明佢真係偷咗老友條橋賺錢！

偷嗒亞連拿斯老婆5年

奧尼爾老婆香妮日前已向法院入紙，要求申請與奧尼爾分居，原因就係忍受唔住「巨無霸」嘅風流性格，既然日日獨守空房，倒不如提早離婚過新生活。其後美國傳媒就爆出，奧尼爾近年大小通吃，其中一個包括亞連拿斯老婆羅拉。

聖誕節都一齊過

據知情人士爆料，奧尼爾與羅拉表面上只係朋友關係，但原來兩人私底下經常見面，就連上年聖誕節都係一齊過，真係話冇嘢都冇人信啦！事實上，羅拉早已被踢爆上年曾多次飛往鳳凰城，而當有記者問佢原因時，佢就話只係去探香妮。不過香妮得悉後即踢爆羅拉根本冇約過佢，所以真正約會嘅人應該係奧尼爾。

據悉奧尼爾與羅拉嘅關係已長達五年之久，可憐亞連拿斯竟然毫不知情，仲計劃準備同羅拉生第三個小朋友。不過咪睇亞連拿斯個樣咁精靈就以為佢好醒，原來佢以前嘅女朋友亦都試過畀綠帽佢戴，第三者又係一名NBA球員，睇怕「狂人」都宿命難違，永遠畀朋友出賣。