劉翔鍾意食香港地道「雲吞麵」！超人氣巨星劉翔下月來港參加東亞運動會，爭取「三冠王」問題不大，再次來到香港這個美食天堂，「劉天王」不嗜山珍海錯，反而想吃一碗地道嘅鮮味雲吞麵，作為「劉天王」老友的香港「欄王」鄧漢昇話，已經做定資料搜集，甘願做「外賣仔」為劉翔送上一碗至美味嘅「細容」！
四年前在澳門東亞運輸過畀劉翔嘅鄧漢昇，兩人其實老友鬼鬼，「阿昇」回想○四年劉翔急Call佢「送外賣」都覺得幾搞笑：「嗰陣時佢嚟到香港參加奧運金牌運動員大匯演，畀幾十個記者圍困喺酒店，想出去食啲嘢都唔得，於是佢就Call我『送外賣』畀佢，仲指定話想食香港最地道嘅雲吞麵添！」其實，劉翔一向都好平民化，衣着與飲食都較為普通，今次再來港就會隨田徑隊住在大會指定嘅荃灣悅來酒店。
精選靚麵送上酒店
「阿昇」話劉翔好回味香港嘅雲吞麵，並且已經為好友做定Research：「雲吞麵煮好之後就要盡快食，所以要搵一間喺酒店附近嘅麵舖。以我所知，劉翔所入住嘅荃灣悅來酒店附近路德圍有幾間唔錯嘅舖頭，應該可以買畀佢一試。」
劉翔現正在廣州準備出戰亞洲田徑錦標賽，呢次係佢復出後嘅第三場比賽，亦係來港參加東亞運前嘅最後一項賽事，其教練孫海平表示愛徒在亞洲賽奪冠冇難度，期望佢能夠在預賽及決賽跑出13秒40，孫指導稱：「內地前幾名都有亞洲第一的水平，所以劉翔奪冠軍難度不大。整個比賽過程應該沒有問題，第一槍預賽就當準備活動跑，第二槍與全運會差不多，13秒30至40，取第一問題不大。」
劉天王今亮相亞洲賽
「劉天王」今日早上會先參戰預賽，而男子110米欄決賽就會在周四晚上演，劉翔今次最大任務就是要贏，爭明年世界盃的入場券。對於亞洲賽賽程安排，孫指導稱：「這樣一來有多半天休息，避免劉翔腳部受到大的刺激，更有利他比賽的發揮及確保安全。」
此外，亞洲田徑錦標賽昨日進行了男、女子百米飛人預賽，香港的黎振浩及梁巧詩都順利闖入複賽。