十指緊扣親密照曝光

早喺上星期，已經有美傳媒發現「天后」舒拉寶娃同胡查錫結伴欣賞樂隊「U2」演唱會，當時兩人態度親暱，關係像霧又像花。正當記者左猜右測之際，寶娃已急不及待自爆戀情，日前高調拖實胡查錫喺洛杉磯街頭漫步，旁若無人任由記者影相。

事件曝光後，外界就一致睇淡呢段戀情，全因兩者地位太過懸殊，女方係體壇天后，才貌雙全仲極度富貴，據福布斯公布年賺二千六百萬美元（約二億港元），但男方只係位籃球奀星，外表普通。所以就連寶娃「粉絲團」都連日炮轟戀情，佢哋認為胡查錫根本冇資格做寶娃男友，唔少網民仲紛紛在網上留言，強烈要求湖人盡快放棄胡查錫，將佢交換到多倫多或密爾沃基等地方，等佢遠離寶娃。

狂插胡查錫未夠班

事實上，胡查錫自○四年加盟湖人後，每場只得平均上陣十幾分鐘，得分亦唔過雙位數，只係隊中一名唔起眼嘅後備兵，年薪只不過五百萬美元。再加上佢最引以為傲嘅三分球近季亦有跌Watt迹象，同曾經登上網壇「一姐」之位嘅寶娃比較，成就確差天共地。

胡查錫

綽號：入球機器　　年齡：25歲

國籍：斯洛文尼亞　身高：6呎7吋

年薪：500萬美元

平均上陣時間：15.7分鐘

平均得分：5.3分

成就：掹車邊奪上季冠軍指環