05/11/2009

播放本新聞相關短片

奧尼爾大爆發騎士降伏巫師

季前被克利夫蘭騎士寄予厚望嘅奧尼爾,尋日面對華盛頓巫師重振雄風,喺球隊大幅落後下挺身而出強攻內線,結果第三節已為球隊收復失地,最終個人攻入21分及搶得8個籃板,助騎士反勝102比90,打出今季代表作!難怪「大帝」勒邦占士賽後猛讚呢位老將。

一度落後14分

騎士今仗開賽後即被作客嘅巫師「孖寶」亞連拿斯及卡朗畢拿連番得手,巫師首節已領先14分。眼見球隊大落後,兩大球星奧尼爾及勒邦占士即改變打法,以個人質素硬爆對手,結果巫師中鋒希活頂唔住「巨無霸」,多次被吹罰犯規,最終六犯提早畢業離場。

騎士第三節氣勢逼人,「大帝」及莫威廉士三分球相繼得手,一鼓作氣打出一段12比4攻勢,早段已反超前,騎士末節繼續強攻,最終贏102比90。雖然奧尼爾得分唔及占士,但「巨無霸」今場既能在內線得分,又能令對手身陷個犯困擾,加上佢不時作出策劃,攞波後分畀較空嘅隊友,所以成為佢個人今季嘅代表作。

韋斯藏械被起訴

全場取得27分嘅勒邦占士賽後表示:「奧尼爾爆發,對我和隊友嚟講都係好大鼓舞!」而教練米克布朗亦非常滿意呢位老將嘅表現,並表示早知道奧尼爾可以為騎士帶來更多貢獻。

另一方面,今仗有份後備上陣嘅韋斯,因超速駕駛及攜帶危險武器等八項罪名正式被警方起訴。韋斯早前駕駛電單車上高速公路時被警方截查,發現其身上有兩把已上彈嘅手槍,據悉每一項控罪都有機會被判罰入獄三年。 ■本報綜合報道