本文重點
聽朝西岸將會上演大戰，猶他爵士將於鹽湖城主場面對聖安東尼奧馬刺，爵士尋日慘遇着晒火嘅達拉斯小牛中鋒魯域斯基，結果被佢以一人之力逆轉，爵士亦於常規賽輸到第三仗。今季爵士士氣的確一般，先後面對西岸球隊丹佛金塊、休斯敦火箭及小牛都輸波，更不約而同都輸在最後一節大跌Watt，估計較多時間休息嘅馬刺今仗贏面較高。 （now 671周五早上11時30分直播）
爵士尾段常魂遊
爵士今季開咧成績麻麻，四戰僅贏過洛杉磯快艇，最值得留意係呢三場敗仗都係輸在最後一節，就連實力平庸嘅火箭，最後一節都能拉開十四分，而尋日更被小牛在第四節攻入四十四分，足證爵士尾段往往魂遊太虛。
其實爵士跌Watt都有迹可尋，前鋒布沙一直想離隊，而基里蘭高自從攞咗份高薪合約後亦無復當年勇，難怪球隊戰力下滑。而馬刺另一優勢係擁有較長休息時間，因為球隊自萬聖節後就冇波打，有四日休息時間，養精蓄銳下應可作客擊敗爵士。