一度落後14分

騎士今仗開賽後即被作客嘅巫師「孖寶」亞連拿斯及卡朗畢拿連番得手，巫師首節已領先14分。眼見球隊大落後，兩大球星奧尼爾及勒邦占士即改變打法，以個人質素硬爆對手，結果巫師中鋒希活頂唔住「巨無霸」，多次被吹罰犯規，最終六犯提早畢業離場。

騎士第三節氣勢逼人，「大帝」及莫威廉士三分球相繼得手，一鼓作氣打出一段12比4攻勢，早段已反超前，騎士末節繼續強攻，最終贏102比90。雖然奧尼爾得分唔及占士，但「巨無霸」今場既能在內線得分，又能令對手身陷個犯困擾，加上佢不時作出策劃，攞波後分畀較空嘅隊友，所以成為佢個人今季嘅代表作。

韋斯藏械被起訴

全場取得27分嘅勒邦占士賽後表示：「奧尼爾爆發，對我和隊友嚟講都係好大鼓舞！」而教練米克布朗亦非常滿意呢位老將嘅表現，並表示早知道奧尼爾可以為騎士帶來更多貢獻。

另一方面，今仗有份後備上陣嘅韋斯，因超速駕駛及攜帶危險武器等八項罪名正式被警方起訴。韋斯早前駕駛電單車上高速公路時被警方截查，發現其身上有兩把已上彈嘅手槍，據悉每一項控罪都有機會被判罰入獄三年。 ■本報綜合報道