本文重點
【本報綜合報道】「玻璃腳」易建聯不愧為容易受傷的男人，佢喺尋日作客山貓賽事中右膝受傷，估計最少養傷兩星期，呢次已經係易建聯加入NBA三年來第十四次傷患，而賠了夫人又折兵嘅籃網，最終亦以六十八比七十九落敗。
籃網近期可謂頭頭碰着黑，因為佢哋頭號球星迪雲夏里士早前已受傷，依家又冇埋易建聯，睇嚟有排先開到齋。籃網今場輸波後，開季成績四戰四負，係籃網十三年來最差開季成績。
隨時抖12星期
籃網面對實力一般嘅山貓全場處於捱打，當大前鋒易建聯離場後，更被對手打出一段二十二比○嘅攻勢，最終僅輸十一分已經偷笑。
易建聯喺過去十四次受傷中，左膝同右膝都屢次中招，可謂「傷膝」青年。軍醫初步趁斷後，表示要到醫院作進一步檢查，如果唔使接受手術嘅話，兩至三周就可復出，但如果要施手術將要抖八至十二個星期，對籃網嚟講絕對係沉重打擊。