本文重點
「老飛人」卡特今季從籃網轉投魔術，終於返回一支具競爭性嘅球隊，有望退休前奪得夢寐以求嘅冠軍指環，難怪籃網球迷對此都毫無怨恨。卡特尋日首度返回籃網主場伊蘇特中心，獲得全場掌聲歡迎，且前隊友們都同其擁抱表示支持，可惜呢位「玻璃人」都係唔爭氣，又試扭傷提早離場。
卡特賽前已表示重返籃網主場百感交集，畢竟佢已經効力籃網五個賽季，而「飛人」又視多名前隊友如布克盧比斯等為兄弟，所以非常懷念喺籃網嘅日子。卡特今場好快入局，頭兩節上陣15分鐘已經攻入16分，只可惜上半場剩餘兩分多鐘時，佢踩中迪雲夏里士隻腳後扭傷足踝，要提早離場，結束首次倒戈之旅，幸好魔術最後都能夠贏95比85。
易建聯慰問師兄
易建聯及布克盧比斯等小將賽後都非常擔心卡特嘅情況，皆因呢班前隊友都唔想見到「飛人」再次因傷錯過奪冠良機。事實上，卡特呢名天之驕子多年嚟飽受傷患困擾，令事業停滯不前，所以籃網球員賽後都話，衷心祝福「飛人」可以再度起飛。