本文重點
上季NBA總冠軍湖人，開咧前曾被美媒體預測，可以繼公牛王朝後成為另一支常規賽70勝或以上球隊，但想唔到只係第二戰就輸波而回。湖人尋日主場迎戰小牛，因中鋒加素續缺陣，內線缺乏良將下，被小牛攻得落花流水！此外MVP高比仔今場亦手風欠順，最終小牛作客大勝94比80，奪得今季首勝。
加素缺陣內線穿崩
湖人中鋒加素因腿筋未傷愈，今季未曾為湖人上陣，雖然球隊仍有拜林及奧當等內線球員支撐，但若論「卡士」，兩人又邊係加素嘅級數。湖人開賽後手風一直唔順，高比仔今場射出19球僅中6個，而阿堤斯就6射中1，老將費沙同樣好似中咗降頭咁，全場9射兩中，多位射手低迷之下，成為湖人輸波關鍵。
此外，小牛今場亦趁加素缺陣下，多番強攻低位，新兵馬利安今場表現Sharp醒，個人攻入18分，而魯域斯基亦進帳21分及10個籃板，其中有10分係來自罰球線，奧當確實mark唔住佢。
缺乏手感嘅高比仔已經係湖人今場得分最高嘅球員，獲得20分，最抵打就係阿堤斯，全場竟然得3分咁大把，難怪有唔少湖人球迷都懷念已離隊嘅阿利沙。不過，湖人聽朝有機會省番靚招牌，皆因佢哋將主場迎戰鷹隊，球隊上季曾於主場大炒鷹隊13分，加上高比仔低迷之後，下一戰例會發火，隨時個人轟四、五十分都唔出奇，湖人勝算濃厚。（有線165台及體育台62周一早上10時30分直播）
