上季最佳新秀戴歷羅斯，因右足踝受傷，季前休息咗接近一個月，所以季前賽都缺陣居多，不過佢尋日同另一受傷患困擾嘅隊友軒域治一同復出，即令公牛戰力大增。公牛今場贏在第三節，分別打出過一段9比2及一段10比2嘅攻勢，結果三節過後領先馬刺十分。因馬刺主將如柏加、謝法臣及芬利等都打唔出應有水準，三人連雙位數字得分都冇，結果公牛保持優勢贏92比85。

6將獲雙位數得分

雖然個人數據上，馬刺嘅鄧肯贏盡全場，佢射入28分及搶得16個籃板獲取「雙雙」，但公牛勝在整體發揮出色，包括戴歷羅斯及鄧格在內，合共六人獲得雙位數字得分，其中鄧格貢獻17分及9個籃板最佳，結果順利贏得今季首場勝仗。

輸波嘅馬刺聽日將會主場遇上帝王，因尋日多名主力都表現差勁，尤其柏加11射4中僅得8分嘅數據，的確令人大為失望，相信聽朝會搵弱旅帝王祭旗，大數對手挽回聲譽。 （周日早上8時30分開賽）