本文重點
綽號「Big Baby」嘅塞爾特人前鋒格連戴維斯，果然係「唔成熟嘅大細路」！佢喺開季前兩日同人打交受傷被送往醫院，經檢查後證實大拇指受創，可能要施手術，除咗錯過開鑼戰，更隨時會畀球隊判罰停賽。
向塞爾特人道歉
事件發生喺周日，當時格連戴維斯約咗老友敍舊，但唔知點解最終變成毆鬥，佢喺凌晨四點畀警方發現，並到波士頓醫院接受治療，照完Ｘ光後發覺傷勢頗為嚴重，估計要養傷約六星期。
事發後格連戴維斯都知衰，返回塞爾特人向教練及所有隊友道歉：「發生啲咁嘅事，我都好失望同覺得對唔住大家，球隊對我嚟講好重要，我希望可以快啲搞掂晒所有嘢，盡快歸隊。」
塞爾特人教練李華士則表示諒解：「Baby唔係壞人，雖然佢今次係做錯咗，但我仍會支持佢，希望佢經一事，長一智，下次唔好再咁鹵莽！但預計球會都會向佢處分及停賽。」