表面上睇，勒邦占士今場有38分及８次助攻，而奧尼爾亦獲得「雙雙」成績，兩人都算交足功課，但「大帝」今場大部分嘅得分，都係來自中遠距離投射，當中包括５球３分波，反而多次硬爆內線卻「炒粉」。占士最厲害嘅地方就係「爆籃」，但奧尼爾加盟後，明顯令對手嘅防線縮窄，反而不利占士嘅發揮。

塞爾特人鐵三角嚟料

「綠軍」塞爾特人今季亦有大動作，就係羅致拉舒華萊士加盟，不過塞爾特人教練李華士先將佢放喺後備席，正選陣容用番「鐵三角」皮雅斯、雷阿倫同加納特，三人純熟嘅合作同默契發揮得淋漓盡致，將各自為戰嘅騎士打到潰不成軍。

拉舒華萊士今場以第六人身份落場，效果亦相當理想，佢內外兼備嘅打法，除咗成功穩固塞爾特人內線之外，仲射入３球３分波，令騎士防不勝防。騎士教練米克布朗承認對手發揮較佳，但只係打咗一場波，球隊仲有好大進步空間。