（周五早上８時開賽）

上季最佳新人戴歷羅斯打完首場對溜馬嘅季前賽後，就因右足踝受傷被迫休養近一個月，要到今場賽前先正式傷愈復出。經過三個多星期嘅休養，戴歷羅斯狀態仍屬未知數，始終佢只係打咗一場季前賽咁大把，手感應未回復最佳狀態。再者，另一控衞軒域治同樣有傷在身，佢因左手肘受傷而缺席上場對巫師嘅季前賽事，今場亦大有機會缺陣。

柏加硬爆戴歷羅斯

基於公牛嘅控衞位置多災多難，預期馬刺都會搵柏加弱點攻擊，硬爆對手戴歷羅斯。事實上柏加近況的確唔差，近三場季前賽平均上陣廿多分鐘，就能交出平均十六分以上，狀態「托弗」。此外多名新兵亦表現對辦，謝法臣進一步加強馬刺嘅進攻速度，而麥戴斯及韋列夫亦增強咗球隊內線嘅板櫈深度，加上康復後嘅真路比利，馬刺絕對夠材料踢走湖人成為西岸一哥。今場面對人腳不整嘅公牛，馬刺應可過關。