本文重點
剛於尋日擊落火箭，成功打響頭炮嘅拓荒者，聽朝將在主場迎戰金塊。拓荒者於開鑼日表現不俗，多位主力如萊爾、韋斯達及艾迪列治都交到貨，今季應有力左右西岸大局。雖然金塊整體實力同樣強勁，不過因早前舟車勞頓飛到亞洲打季前賽，狀態不及主隊，估計拓荒者勝算高。（now 671周五早上10時30分直播）
今季被譽為西岸黑馬嘅拓荒者，開鑼戰面對缺少姚明及麥基迪嘅火箭，結果憑萊爾取得20分，加上韋斯達拿下14分及後備上陣嘅歐羅攻入23分，終以96比87贏波，火箭表現較好嘅只有取得19分嘅布魯克斯。拓荒者今場一度將比分拉開超過廿分之差，只係最尾「垃圾時間」先畀火箭追回不少分數。
拓荒者一班主力都只係廿歲出頭，進步空間頗大，尤其係兩名內線球員艾迪列治及奧登，後者經過不太如意嘅新秀賽季後，相信已適應ＮＢＡ嘅打法及節奏，預期可為球隊貢獻更多，而射手萊爾更早已成為星級球員。此外安祖米拿嘅來投，亦可憑其經驗來穩定軍心，拓荒者整體實力無疑更強。
金塊喪玩未入狀態
金塊方面，因上季未受注目下打出超水準，並殺入西岸決賽，估計今季路途會較難行。球隊早前飛到台灣及北京打季前賽，但表現只屬一般，且此行玩多過練，所以球隊狀態並唔理想，季前賽成績亦只得四勝四負。其實兩軍喺季前賽亦有交手，當時拓荒者主場以98比96贏波，該仗拓荒者全憑第四節打出水準才能反勝對手，今日再有主場之利下，有望再贏一仗。