奧尼爾依然爆得

上季常規賽冠軍騎士，季前焦點必屬新兵奧尼爾，雖然「大鯊魚」已年屆三十七歲，但冇人會質疑一代中鋒嘅能力，加上佢季前賽表現亦算對辦，平均上陣二十分鐘左右就交出十分以上，絕對寶刀未老。

不過，球隊季前飽受流感影響，就連「大帝」勒邦占士都中招，所以季前賽成績並唔理想，四勝四負僅得五成得勝率。此外射手韋斯亦受到抑鬱症困擾，季前以私人理由缺席賽事，預期季初都唔使預佢，令騎士缺少一位外線能手，所以新加盟嘅老將安東尼柏加將會暫代正選。

塞爾特人方面，眾所周知因為加納特上季嘅意外受傷，令球隊痛失衞冕機會，所以今季痛定思痛，簽入拉舒華萊士加強內線替補力量，另外亦搵嚟馬基斯丹尼奧斯及舒頓威廉士，整體實力無疑更強。

塞爾特人谷起晒

塞爾特人喺季前賽嘅表現平穩，其中最值得留意嘅一場賽事，就係上周作客騎士贏九十六比八十二，要知道當日兩大「巨頭」雷阿倫及加納特都未有落場，可見塞爾特人嘅狀態，的確較騎士為佳。因此，塞爾特人初段時間領先機會高，下半場就要留意騎士嘅鬥志。