「滑冰王后」Michelle關穎珊，果然係體壇不可多得嘅女強人！身兼美國公共外交特使嘅Michelle，決定攻讀碩士，專攻國際關係研究，話到明希望「幹一番大事」，為世界和平作出貢獻。
曾五奪世界冠軍兼擁兩面冬奧花樣滑冰獎牌嘅Michelle，今年初重着冰鞋復操，一度有意參戰明年冬奧，但佢最後都係決定重返校園，入讀美國Tufts大學Fletcher分校，全職修讀國際關係研究碩士，29歲嘅Michelle原來有宏大理想：「我想看得遠一些、大一些，我一直希望能投身一份讓我為社會作出貢獻的工作，為建設更美好的世界提出我的意見。」
Michelle去年喺丹佛大學國際研究系取得學位，並獲美國委任為公共外交特使，「我以大使身份到訪過很多國家，這些經驗都令我獲益良多，我急不及待接受更多的挑戰。」