踢唔到波畀佢學琴

呢位前香港足球先生兼上季最佳教練，退出球圈後做咗廿四孝老公，前日喺產房陪住老婆生產，睇住個女出世，佢話：「離開球圈，有自己足球學校，依家做埋老竇，我覺得自己踏入人生另一個階段。」睇住個女出世，佢更感動落淚：「踢波咁多年都未試過喊，但當見到自己個女出世，嗰一刻真係好感動，然後淚流滿面。」

山度士擁有葡萄牙同英國血統，老婆係中國人，生出嚟嘅混血女白白滑滑，個樣似足山Sir咁，而為咗迎接小生命，佢哋兩公婆幾個月前已買齊所有嬰兒用品，舊隊友例如「大卓」賴啟卓又送咗好多嘢畀佢，準備妥當，隨時可以抱囡囡返屋企。由於係女仔，山度士話應該做唔到足球員，但佢好鍾意音樂，所以會栽培個女彈鋼琴。